საქართველო-ჩინეთის ეკონომიკურ თანამშრომლობასა და დიდი აბრეშუმის გზის განვითარების პერსპექტივაზე ისაუბრეს დღეს პარლამენტში გამართულ შეხვედრაზე საქართველოს პარლამენტის თავმჯდომარის მოადგილემ, ზვიად ძიძიგურმა და ჩინეთის სახალხო რესპუბლიკის მშვიდობისა და განვითარების ფონდის წარმომადგენლებმა და ფონდის ვიცე-სპიკერმა იუ ჰონგჯუნმა. 

როგორც ზვიად ძიძიგურმა შეხვედრის ბოლოს განაცხადა, ჩინეთის მშვიდობისა და განვითარების ფონდი, თხუთმეტზე მეტ ორგანიზაციას აერთიანებს. დელეგაცია საქართველოსთან ეკონომიკური თანამშრომლობის ასპექტებს სწავლობს და დაინტერესებულია აბრეშუმის გზის ეკონომიკური სარტყლის საკითხით.

„ჩინეთის დელეგაციების ასეთი გახშირებული ვიზიტები სწორედ ამ ეკონომიკური პროექტის ირგვლივ, პირდაპირ კავშირშია იმასთან, რომ ჩინური ტვირთები, ევროპის მიმართულებით, საქართველოს გავლით უფრო ინტენსიური გახდება. ამით საქართველო მიიღებს სერიოზულ მოგებას და მოგებას ნახავს იმითაც, რომ შესაბამისად განვითარდება ინფრასტრუქტურა“-განაცხადა ჟურნალისტებთან საუბრისას ზვიად ძიძიგურმა.

შეხვედრაზე ითქვა, რომ საქართველოს გავლით ჩინეთი გეგმავს ევროკავშირის ხუთასმილიონიან ბაზართან ურთიერთობას, რაც ძალიან მნიშვნელოვანი ეკონომიკური პერსპექტივაა ჩვენი ქვეყნისთვის.

შეხვედრას ესწრებოდა ჩინეთის სახალხო რესპუბლიკის ელჩი საქართველოში ძი იანჩი.